Festa tal-Beatu Nazju Falzon, Terzjarju Franġiskan

Din is-sena wkoll l-Ordni Franġiskan Sekular se jiċċelebra l-Festa tal-Beatu Nazju Falzon. Ser tiġi ċċelebrata Quddiesa l-Belt Valletta, fil-Knisja Santa Marija ta’ Ġesù (magħrufa bħala Ta’ Ġieżu u fejn jinsab midfun il-Beatu) nhar it-Tnejn, 30 ta’ Ġunju fil-18.15 p.m.

Il-Ħajja ta’ Nazju

Nazju Falzon twieled fl-1 ta’ Lulju 1813 fid-dar numru 49, Triq id-Dejqa l-Belt. Il-ġenituri tiegħu kienu l-avukat Ġużeppi Falzon li aktar tard laħaq imħallef u martu s-sinjura Marija Tereża Debono.

Nazju ġie mgħammed fil-Knisja ta’ San Duminku fil-Belt nhar it-2 ta’ Lulju, jiġifieri l-għada li twieled. Hu kellu tlett ħutu oħra kollha subien. Dawn kienu Dun Franġisk, Dun Kalċidon u Antonju li kien avukat.

Ta’ 21 sena Nazju kien diġà llawrijat avukat u duttur tal-Liġi Kanonika. Hu sar avukat biex ikun jista’ jgħin lill-foqra b’xejn. Minħabba li dak iż-żmien kien hawn ħafna baħrin u suldati, Nazju beda jlaqqagħhom u beda l-appostolat tiegħu ta’ konverżjoni magħhom. Sas-sena 1840 Nazju kien ilaqqa’ fid-dar tiegħu madwar 30 suldat kull filgħaxija u kull nhar ta’ Ħadd in-numru ġieli laħaq il-100. Meta n-numru tas-suldati beda dejjem jiżdied, bosta suldati Protestanti kienu qed jiġu mħajra mis-suldati Kattoliċi Irlandiżi biex jattendu għal-laqgħat li kien jagħmlilhom Nazju fil-Knisja tal-Ġiżwiti fil-belt.

Nazju kien ta’ kuljum ilaqqa’ lis-suldati kuljum kwarta wara l-Ave Marija u wara li kien jingħad ir-Rużarju, kien ikun hemm anke xi katekisti biex iħarrġuhom fir-Reliġjon Kattolika. Ġieli kien ikun hemm xi mgħamudijiet. Kien ikun hemm il-qrar ukoll.

Bil-ħidma ta’ Nazju kkonvertew 650 Protestant, 4 Għarbi u 2 Lhud. Dan kien tassew appostolat abbundanti. Nazju Falzon kien iddedika ħajtu għall-appostolat tat-tagħlim tal-Katekiżmu tal-kbar u tat-tfal.

Fid-9 ta’ Mejju 2001 il-Papa Ġwanni Pawlu II iddikjarah Beatu waqt żjara f’Malta flimkien ma’ Ġorġ Preca, issa Qaddis, u Adeodata Pisani.

Jekk tridu tkunu tafu iżjed fuq il-ħajja tiegħu żuru l-Websites

http://www.geocities.com/vennazfal/
http://www.ofm.org.mt/downloads/ahbar/ahbar2006/ahbarjul06.pdf
http://www.freewebs.com/museumstjulians/qaddisinmaltin.htm

13 ta' Ġunju - Sant'Antin ta' Padova

Sant’Antnin u l-Ewkaristija

Jekk sa mill-bidu kien hemm mewġ ta’ nuqqas ta’ twemmin dwar il-preżenza reali ta’ Ġesù fl-Ewkaristija Mqaddsa, dan kien jinħass ħafna fis-seklu 13, iż-żmien li fih kien jgħix Sant’Antnin ta’ Padova, imsejjaħ ukoll il-Qaddis ta’ L-Ewkaristija. Il-ġrajja storika tal-miraklu ta’ l-Ewkaristija u l-ħmara fil-ħajja tal-qaddis, tirrifletti tajjeb kemm tassew l-ereżija kontra l-preżenza reali fl-Ewkaristija kienet isserrep ġmielha.

Il-fatt gara f’Rimini, l-Italja. Wieħed nobbli bl-isem ta’ Bonillo ried iwaqqa’ għaċ-ċajt il-priedka ta’ S.Antnin dwar il-preżenza ta’ Ġesù fl-Ewkaristija Mqaddsa. Dan beda jxewwex in-nies kontra t-tagħlim tal-qaddis u darba kellu l-ħila jisfida wkoll lil S.Antnin b’imħatra. Sar ftehim bejniethom, iltaqgħu fil-pjazza tal-belt, S.Antnin ħa l-Ewkaristija Mqaddsa filwaqt li Bonillo ħa ħmara msawwma bil-guħ għal tliet ijiem. B’għaġeb ta’ kulħadd, kif il-ħmara waslet quddiem il-qaddis bl-Ewkaristija fidu, dik ċediet u bħal niżlet għarkobbtejha biex tadura lis-Sagrament Imqaddes. Kien kollu għalxejn li dak il-ħin ressqulha l-ikel biex tiekol u saħansitra bdew iniggżuha u jsawtuha, il-ħmara baqgħet b’wiċċha fl-art sa ma l-qaddis ta s-sinjal biex in-nies imorru lura f’purċissjoni bis-Sagrament lejn il-knisja mnejn kienu ġew.

Wieħed jistaqsi: għalfejn dan il-miraklu u tant oħrajn li saru wara? It-twegiba hi waħda għalina u minħabha fina, biex nemmnu u nħobbu lil Ġesù preżenti fl¬-Ewkaristija Mqaddsa. Sant’Antnin kompla jxerred din il-verità bit-tagħlim tiegħu li ħallielna fil-priedki msejħin Sermones. U għalfejn saret dik is-sena ddedikata għall-Ewkaristija? Biex insaħħu t-twemmin tagħna, biex nuru mħabbitna bl-għemil, biex ngħixu l-Ewkaristija Mqaddsa. Kif? Billi nżuru ta’ spiss knisja fejn hemm it¬-tabernaklu bl-Ewkaristija, nieħdu sehem kull meta ssir xi adorazzjoni Ewkaristika, kull darba li nidħlu u noħorġu mill-knisja nsellmu lis-Sagrament bil-qalb u bil-qima. Nisimgħu ta’ spiss il-quddiesa u nħejju ruħna sewwa għat-tqarbin. Wara, nagħmlu djalogu ma’ Ġesù li jkun fina. Meta ngħaddu minn quddiem knisja nagħmlu sinjal ta’ rispett lil Ġesù fl-Ewkaristija.

Dawn u hwejjeg oħra kien jagħmel il-qaddis Antonju matul ħajtu. Fuq l-eżempju tiegħu irridu aħna wkoll nikbru f’dik l-imħabba lejn Ġesù fl-Ewkaristija, dik l-istess imħabba li dwarha l-Mulej kien staqsa lil Pietru għal tliet darbiet: "Inti tħobbni?"